majski bom
- Details
- Category: Uncategorised
- Published on Wednesday, 30 May 2012 18:08
- Written by Denny Müller
- Hits: 5488
Majski bom
Majski bom jo symbol płodnosći a strowosći. Wón staja se tradicionelnje źeń pśed prědnym majom. Za majski bom wubjerjo se jedła abo škrjok. Škóra se wobělijo a zdonk se wusušyjo. Na najsy se wuryjo dłymoka źěra, do kótareje se majski bom stajijo. Někotare dny do stajanja majskego boma nawijo wejsna młoźina dłujku zelenu girlandu a wěnc z jeglinowych gałuzkow. Na wjerchu se młoda brjaza pśiwěžo. Pód nju pśipówjesyjo se ten wěnc z pisanymi banśikami. Wót wěnca sem se girlanda wokoło štoma zwijo. W nocy se majski bom wót młoźiny wobstražujo, až njeby jen młoźeńce ze susednych jsow pódrězali. Gaž se to weto stanjo, dej se majski bom wukupiś, howac njesmějo se sedym lět wěcej žeden majski bom stajiś. W zwisku z wejsnym swěźenjom se wokoło majskego boma rejujo. W Dolnej Łužycy stoj majski bom cesto až do Jana. Pón se pódrěžo a se na pśesajźowanje pśedajo.